2021-05-05Монгол Улсын “Хөдөлмөрийн тухай хууль”-ийн 5 дугаар зүйлийн 5.1 дэх хэсэгт “Ажил олгогч нь хууль тогтоомжид нийцүүлэн хөдөлмөрийн дотоод журам баталж мөрдүүлэх, ажилтнаас хөдөлмөрийн гэрээгээр хүлээсэн үүргээ биелүүлэхийг шаардах, энэ хуульд заасны дагуу хариуцлага хүлээлгэх эрхтэй”, мөн хуулийн 130 дугаар зүйлийн 130.1 дэх хэсэгт “Ажил олгогч нь ажилтны төлөөлөгчдийн саналыг харгалзан хөдөлмөрийн дотоод журмыг хууль тогтоомжид нийцүүлэн баталж мөрдүүлнэ, “Хөдөлмөрийн аюулгүй байдал, эрүүл ахуйн тухай хууль”-ийн 28 дугаар зүйлийн 28.1.6 дахь хэсэгт “Ажил олгогч нь ажлын байрны онцлогт нийцсэн дүрэм, заавар, журам баталж мөрдүүлэх үүрэг хүлээх” талаар тус тус хуульчилсан нь байгууллага, аж ахуйн нэгжийн удирдлага “Хөдөлмөрийн дотоод журам” баталж мөрдүүлэх эрх зүйн үндэс болж байна.
Дээр дурдсан хуулийн заалтаас харахад компани нь Монгол Улсын хууль тогтоомжид нийцүүлэн хөдөлмөрийн дотоод журам баталж мөрдүүлэх нь ойлгомжтой байгаа хэдий ч практик амьдрал дээр хөдөлмөрийн дотоод журмыг хэт явцуу утгаар зөвхөн байгууллагын дотоод үйл ажиллагаанд хориглосон зарим нэг зүйлийн хүрээнд 10-20 нүүр бүхий эрх зүйн эх үндэс болон боловсруулалт муутай, ач холбогдолгүй бичиг баримт гэсэн хандлагаар авч үзэн, ойлгож иржээ. Өмчлөлийн ямар хэлбэртэйгээс үл хамааран аж ахуйн нэгж нь хөдөлмөрийн дотоод журам батлан гаргах, мөрдөж ажиллах үүргийг хуулиар хүлээдэг боловч хөдөлмөрийн дотоод журам, түүний бүтэц, агуулга, хэрэглээ нь манай улсад төдийлөн хангалттай хөгжөөгүй байна.